مرقعة العلاقات أو ال Situationship
الحقيقة محدش كتير اتكلم عن المصطلح دا مرقعة العلاقات أو ال Situationship، وترجمته الدقيقة هي علاقة غير محددة أو غير رسمية أو علاقة وضعية غير مفهومة.
هي أزمة نفسية متنكرة في شكل علاقة كيوت! بتكشف خوف عميق عند الطرفين: خوف الطرف التاني من الارتباط الرسمي، وخوفك أنت من أن تبقى لوحدك أو العكس طبعاً بصرف النظر عن مكانك في العلاقة، هي حاجة كدا ما بين الصداقة والحب، أو صداقة في انتظار تحولها للحب، علاقة غير مفهومة ضارة جداً للطرفين.
طب ايه ضرر مرقعة العلاقات أو ال Situationship؟
ما هو ضرر مرقعة العلاقات أو ال Situationship؟ ورقة وقلم ونشرحه واحدة واحدة، أكتب على وش الورقة بس عشان نفس الورقة دي هنحتاجها تاني من الضهر:
- أنت أصلاً حاسس أنك قليل أو مش كفاية، ومش شايف نفسك صح، وكأن عندك إحساس جواك إنك ماتستاهلش علاقة واضحة وثابتة، فبتستسهل وبتوافق على فتافيت المشاعر والاهتمام، على أمل تتطور المشاعر.
- رعب إنك تتساب أو الخوف من الهجر (Abandonment Issues)، ودا بيخليك تفضل في علاقة تعبانة بدل ما تواجه الوجع بتاع “أنا سبته” أو “أنا بقيت لوحدي”.
- تتهرب من وجع الدماغ والمسئولية والالتزام عشان كدا قلت لكم في الأول أنها مرقعة أو مياعة، بيكون كل طرف عايز ياخد الدلع والدعم العاطفي، بس من غير ما تشيل هموم ومسؤوليات “الارتباط الجد”، فبتلجأ لحل وسط اسمه #Situtionship، بكل أسف النوع دا منتشر كتير عند الأشخاص غير الشاعرين بالاهتمام أو الحب.
- مش بس ما سبق، لكن ضيف عليهم أن شريك حياتك أو إللي أنت راكنه ووارد يكون شريك حياتك دا لو نجحت أم العلاقة دي بيخاف يقرب (Avoidant Attachment)، لأن الطرف التاني بطبعه بيتخنق من القرب العاطفي الحقيقي، فبيحافظ على مسافة بينكم عن طريق إنه مابيديش اسم للعلاقة، وحضرتك بمنتهي ارتياح الضمير بتدخل في الخندق بتاعه.
- مرقعة العلاقات تخريب نفسي بالبطيء: قلق على طول الخط (Anxiety): عايش في حالة “يا ترى هيكلمني إمتى؟” و “إحنا إيه لبعض بالظبط؟”. القلق ده بيسحب طاقتك وبيخليك مجهد عصبياً طول الوقت، وكمان لو الطرف التاني محققش توقعاتك غير المنطقية ثقتك في نفسك بتتهز، ودوخيني يا لمونة ودائرة الألم تلففك في الحلزونة.
- رغم أن فيه حد لكن أنت وحيد، مشاعرك محبوسة ومابتلاقيش الأمان العاطفي اللي هو روح أي علاقة سليمة.
طب نعمل أيه، نتعالج إزاي من مرقعة العلاقات أو ال Situationship؟
مرقعة العلاقات أو ال Situationship هي علاقة مجهدة مؤذية بالشكل دا، هات بقى الورقة والقلم إللي سبناهم فوق، وأقلب الورقة نكتب على ضهرها المرة دي:
- العلاج دايما يبدأ بقرار واحد قوي جدًا يا إما كلام واضح، يا إما مفيش كلام خالص، أو زي ما بحب أقولها للي بيسألني في الجلسات النفسية الفردية “أوك ولا بلوك”.
- أقعد مع الطرف التاني واطلب منه موعد معين أو أنت حدد الموعد لنفسك عشان تكون قادر انك تتحرر من الاذي. قعدة المصارحة القاطعة.
- تظبيط “قيمة نفسك” من جديد: قبولك بأي حاجة مفيهاش وضوح دي خيانة لنفسك، خليك واثق أنك تستاهل علاقة واضحة ومستقرة، والناس كلها عارفاها ومقدراك وفي النور.
- وجع الانفصال، أهون من جرحك، املأ حياتك بناس تستاهلك مش تستهلكك، وخليك فاكر كويس جداً أن العلاقة السليمة بتيجي بوضوح، و التزام، واحترام متبادل. وكفاية إهدار طاقة في “ولا حاجة”، وركز طاقتك إنك تبني نفسك لنفسك.
#مرقعة_العلاقات_أو_الSituationship
#علاقات #نفسيات
#اتعلموها_بقى
#دكتور_طلعت_حكيم
الأسئلة الشائعة عن مرقعة العلاقات أو الـ Situationship
1. ما هي مرقعة العلاقات أو ال Situationship؟
هي علاقة غير واضحة الملامح، تجمع بين شخصين بدون اتفاق صريح على شكل العلاقة أو هدفها. بتكون أقرب لعلاقة عاطفية بدون التزام حقيقي، يعني لا هي صداقة ولا هي حب رسمي، وده بيخلي الطرفين يعيشوا حالة من الارتباك العاطفي.
2. كيف أفرّق بين مرقعة العلاقات أو ال Situationship والعلاقة الرسمية؟
العلاقة الرسمية بيكون فيها وضوح، التزام، واحترام متبادل للمشاعر.
أما مرقعة العلاقات أو ال Situationship فغالبًا بتعتمد على التواصل المتقطع، الغموض، وتجنب الحديث عن المستقبل أو “العلاقة دي رايحة على فين؟”.
3. ما الأسباب اللي بتخلي الناس يدخلوا في مرقعة العلاقات؟
-
الخوف من الالتزام أو الرفض.
-
التعلق السريع دون معرفة كافية بالطرف الآخر.
-
الاحتياج العاطفي والوحدة.
-
تجارب سابقة فاشلة بتخلي الشخص يخاف يكررها.
4. هل ممكن تتحول مرقعة العلاقات أو ال Situationship لعلاقة جدية؟
في حالات قليلة جدًا، ممكن يحصل ده لو الطرفين قرروا بوضوح تطوير العلاقة ووضع حدود والتزامات.
لكن في الأغلب، لو بدأت العلاقة بدون نية أو التزام واضح، بتكمل بنفس النمط وبتنتهي مع الوقت.
5. ما العلامات اللي تدل إنّي في Situationship؟
-
مش واضحين لبعض في تعريف العلاقة.
-
مفيش خطط مستقبلية.
-
التواصل متقطع ومزاجي.
-
الطرف التاني بيتجنب الكلام عن الالتزام.
-
بتحس إنك دايمًا في حالة قلق أو انتظار.
6. هل Situationship دايمًا مؤذية نفسيًا؟
مش دايمًا، لكن في الغالب بتسبب توتر، قلق، وتعلق غير صحي، خصوصًا لما يكون طرف مرتبط أكتر من التاني.
الضرر النفسي بييجي من غياب الوضوح والأمان العاطفي.
7. إزاي أخرج من مرقعة العلاقات من غير ما أتأذى؟
-
اعترف لنفسك إن العلاقة دي مش مريحة.
-
احط حدود واضحة للتواصل.
-
اتكلم بصراحة عن مشاعرك واحتياجاتك.
-
لو مفيش تجاوب، انسحب تدريجيًا واحط نفسك أولوية.
-
ركز على التعافي وإعادة بناء ثقتك بنفسك.
8. هل ينفع نفضل أصدقاء بعد انتهاء مرقعة العلاقات أو الـ Situationship؟
صعب جدًا، لأن المشاعر اللي كانت موجودة ممكن ترجع بسهولة.
الأفضل يكون في فترة مسافة وقطع مؤقت للتواصل عشان التعافي يتم بشكل صحي.
9. إزاي أتجنب الدخول في مرقعة العلاقات أو الـ Situationship من البداية؟
-
اسأل من البداية عن نية الطرف التاني.
-
متخافش من الوضوح.
-
لاحظ تصرفاته مش كلامه فقط.
-
خليك صادق مع نفسك في تقييم العلاقة.
-
حافظ على حدودك واحترامك لذاتك.
10. هل مرقعة العلاقات أو الـ Situationship ممكن تأثر على العلاقات المستقبلية؟
أيوه، لأنها بتخلي الشخص يشك في نوايا الآخرين أو يخاف من التعلق.
لكن الوعي الذاتي والتعافي النفسي بيساعدوا على تجاوز التجربة دي وبناء علاقات صحية بعد كده.